American Idiot

大家有冇睇過D則新聞呢?

係星矢迷既就一定睇過，
不過我知道大家一定睇唔明架la !

等我同大家翻譯下la
刷除左D睇唔明既日文。
佢大概係講關於星矢既
冥王篇前章終於肯再出la !

而.........終於肯再出la.......
我仲以為個作者死左tim。

哈哈...佢再出返就算啦。
平安夜除左同fd一齊之外
仲有星矢睇，真係愉快。



尋日，
去左黃副校屋企大飲大吃，真係唔好意思la。
其實本來我冇份去既，我又唔係讀宗教喎。
我都係頂人個位既姐 !
哈哈......又係頂人個位......我諗我大日都係做D二打六架la。
二打六角色真係適合我做，大家有D咩扮樹呀、扮死呀唔夠人，
記住搵我。

尋日，拎晒全副身家加埋我家姐D散銀--60幾蚊出去。
諗住實唔夠用啦，點知用左10蚊，用來買左份禮物。
咁就又飲又食左成日la，真係估唔到。

更估唔到既係，
黃副校係屋企既地位原來比Rocky(一隻狗)更低幾級。
平時既黃副校我就唔知，
尋日我睇到既黃副校就係一個負責幫Rocky執玩完D野既工人。
黃副校仲要講左句 : 唉，我唔執，仲有邊個同佢執呀。

而..................咁黃副校個老婆呢?
哈哈。黃副校既老婆更唔洗講，完全係黃副校屋企既另一個校長。
完全咁食住黃副校。她講故事，黃副校都只會聽，很少插咀。
黃副校個老婆講故事能力比校長更強tim。
哈哈...不過她講故事時，我就訓左覺，可能之前行得太耐啦。

唔。
下次有機會一定要再去。

Super Model

張相iman send比我既。點解叫佢iman?
因為聽人講佢剪左個男仔頭，仲好似話幾好睇tim。

而..........................張相中間後面果個未尹顯龍 !
同咁多女同學一齊影相，一定好受女同學歡迎啦 !
如果大家咁諗就錯啦 !
我都想。其實女同學們平時係so都唔so我既 !
而..........................又問啦?咁點解會同咁多女同學一齊影相既?

其實就係咁既，我地7A就好團結既。女同學一話影相呢。
第2日就成班一齊影架la，一話好似冇試過著夏季校服影喎。
第2日就算饑寒交迫or橫風橫雨，成班都一定一齊著夏季返來架la。
當然除左一D仆街既同學(唔係罵佢，佢真係仆到隻腳傷晒)唔方便la。
果一日呢，咁arm就有些女同學唔得閒，未返到喎。
跟住1點20分中史又要測驗喎(如下圖所示)。
咁未唔人齊囉，咁點算呀 ? 我地7A講團結個喎。點算好呀?

跟住莊鈞婷就諗到個方法la ! 就係叫我頂住未返既女同學先la。
你見我扮到咁cute，唔洗多講，都知我頂緊邊個女同學個位啦。
而..........................又有野問 ? 7A咁團結，點解會冇男仔一齊影既。
你就話要頂住女同學果位先姐。
其實係咁既，話明7A好團結，女同學團結，男同學都好團結既。
所以呢。一個男同學唔影，全班男同學都會一齊唔影既。極講究團隊精神。
我好記得，我叫吳俊輝一齊影啦，陸志康一齊影啦，
大家一齊影啦......係完全冇人認我既，所以最唔合群果個男同學一定係我既。

影完幾張相，Miss來到，跟住我就緊係唔影啦。
雖然Miss老左D(岩岩仲過埋大壽)，不過話晒都屬於female。
所以頂住未返既女同學先既D個角色，就比Miss頂返啦。

哈哈.......一張相背後竟然有一個咁長既故事。

















本來E張相冇咩特別，但係大家留意下黑版就知。
女班長日日都會寫係黑版，叫男仔們交sectionE。
唔經唔覺，咁就叫左一個星期。
同學們都肆無忌彈咁日日唔交。就好似心裡面同Miss講緊 : Miss?你吹咩?
又再一次發揮出7A男同學既團結。
聽人講好次話下過星期都唔會交住tim。
(其實係張葴帶頭話唔交既。我都係睇佢頭架炸。諗住交果時記得叫埋我。)
不過應該都唔交住啦，還掂尋日欠左中化星期1都要記留堂。

唔知點解D排好鐘意駁Miss講既野，
哈哈，可能知道就來冇機會瓜。

Taking Over Me

唔只game出得快。
電器壞得仲快。
屋企部洗衣機買左半年。
竟然壞左 !

呀媽搵左成朝，都搵唔到張單，
D垃圾單就搵到成屋都係，
中一時買電腦，小學時
買部walkman張單就搵撚到。
差D連出世紙都搵埋出來，
係溫唔到洗衣機張單。

真係冇野好講。






跟住，呀媽竟然叫我起我返學D notes度搵下有冇張單，
順便叫我將冇用果D notes丟埋佢喎。
下 !?
有讀過書既都知道係notes入面搵一張小小既單據係一件難事。
你要知道我中1至中7所有科既notes係混合一齊放既。
平日要係書包搵出一張尋日派既經濟科筆記，都要搵成堂，仲要搵唔到。
加上中史個miss每做完一次功課，
都會派回一疊佢所謂既「佳作」比我地睇既。
剩係中史疊notes疊埋一齊都高過姚明啦，點搵呀 ?
真係難過大海撈針喎。

為左唔想搵，我同我呀媽講左一個極度違背我良心既大話。
媽me呀，疊notes有用架，我之前睇過晒啦，我肯定張單唔係入面呀。
嘩 ! 講完之後，我自己都想打死我自己。
同一個為了唔想找麻煩既人證，
係法官面前話一個殺人犯冇殺過人有咩分別呢 ?

notes實在太多啦，見到都唔想搵啦，講大話係人之常情。
至衰都係D仆街miss亂咁派埋D垃撚圾notes，
佳作分享喎，次次都係古思毫、鄭嘉恩、吳俊輝。 搵鬼睇咩。

Come on you reds

唔講大家一定唔知，
由於winning入面曼聯好好用
所以我前排變左半個
或者1/3個或者再少D既曼聯fans
不過都唔重要，
總知我係想曼聯贏波既。






認住下面左邊藍衫果位球員，叫C朗拿度 。
一位花式足球紅星，係賓菲加既主要功臣之一。
















尋朝早，特登四點鐘起身諗住睇曼聯出線，
點Q知........哈哈，見到個Q字都知曼聯既結局la。

我睇佢地踢，仲以為自己睇緊曼城 ，唔係曼聯。
(sorry，咁樣講好似有D侮辱左曼城tim)
曼聯踢到就好似一班剛剛玩完泥沙既小學生去踢波
就係踢到一盤散沙咁，比人追平後(上半場10幾分鐘)
就沒有任何一次有威脅既功門 !
人地隊賓菲加已經有6個主將缺陣。
一隊波都係11人姐，人地都差唔多全隊副選上陣架la
人地入波果個前鋒，仲要係己經連續16場冇入過波
唔通曼聯，就係見佢咁耐冇波入，
所以成班後衛走開晒咁，讓條路比佢入波 ?

可恥的是，曼聯整傷左人地個球員，人地踢返個波出界，
之後，曼聯竟然唔比番個波人，繼續踢。
基本上D樣野，係唔會發生係歐洲任何一隊勁旅身上的。
相信任何一個曼聯迷都係，聞者傷心，聽者留淚。

真係唔明，曼聯平時踢聯賽都唔錯。
真係唔明點解一踢歐聯就衰到咁，
不過算啦，歐聯都睇唔到佢地la，希望佢地聯賽踢得好D la
歐聯，下年再見。

Holiday

好玩既game續集
出得真係快。
好似王國之心咁
咁快又出第2集la
我連第一集都未爆呀。

有機會要一次過
打返爆佢地。

























I beg to dream and differ from the hollow lies
This is the dawning of the rest of our lives.

其實我覺得老師應該1個月就要培訓一次。
一年一次實在係唔足夠架 !

自從前排D測驗成績仆晒街之後，
先有econ測驗長題目得1分(MC唔計，因充滿亂作既成份)之後
PA更創新低點，get zero，唔係洛克人個死敵zero喎，真係零分喎.....。

今早，我終於諗通點解我D排D測驗咁差啦 !
工欲善其事，必先利其器。
主要原因係我從來冇文具上課同測驗。
試問用一支就斷就斷既筆來寫野同一張人地既八達通來測驗時簡線 ?
又點會有好成績呢 !
所以，我今日終於用左10蚊來買左支籃筆同簡尺啦 !
我想買埋塗改液架，不過唔夠錢 !
要剩返$100來買魔神英雄伝套扭蛋。唯有等有錢至買返塗改液。
有左籃筆同簡尺，高考有望 !

當然，少溫習，少做功課都係令我成績差既一些次要既因素啦。
所以，襯著今日放假，我去左自修室自修既。
溫溫下書，坐我隔離個小學生做做下功課突然問我 :
哥哥呀，木棉樹既棉花，係末就係木棉樹既花呀？
嘩，小學生D功課咁能難既!?小朋友，你想我點答你呀。
我就同佢講 : 嗯......你係條問題到打個問號，返學校問老師la。
佢走果時仲同我講唔該tim。
小學生就來自修室溫習，真係勤力。自己小學時機鋪就去過一次。

真係要向小學生學習下，不但勤力溫習，更勇於發問。
真係學習的主人，這種讀書態度，我係完全冇既。
遊戲機、電腦，唔可以玩咁多la，用都係至多用一陣。

半睡半醒既生活，我唔應該再過啦 !
係時候要多抽D時間來溫習下。

This is my life
On holiday.

anywhere but here

而家時間都唔係好多
又要諗Jupas揀咩

今日，仲比對面屋叫左我去教佢個女裝D咩教學軟件喎。
裝教學軟件好鬼白痴哩。佢地就係咁白痴。
唔係比佢叫左幾次唔好意思推，我真係唔過去。
冇理由比佢望住我睇緊電視，我同佢講話好忙、唔得閒架，握miss就得姐!

過到去，坐一坐底。
佢話部電腦買左幾個月，成萬蚊，不過係冇得上網姐。
話買來玩小畫家喎，畫D畫一定靚D架la !
跟住就幫佢裝隻有隻熊仔同太空人係面既教學光碟la。
我同佢講，隻碟都幾得意喎。
佢呀媽就話買左200蚊既($200一隻CDR!?)。
仲話叫佢買果個人話又有得玩、 又有得學英文同普通話，
仲問我佢有冇比人握到tim? (竟然$200一隻CDR!?)
我未好誠實咁話 : 冇~~，
如果隻碟真係又有得玩、又有得學英文、普通話既話，都幾低呀 !

幫佢裝完隻碟之後，其實都唔係裝D咩，一入隻碟落去就係，
唔明點解佢要晒我時間來幫佢入，除非佢唔識入隻碟落去既姐，
無理由呀，入面本身又有隻碟個喎，除非佢話隻碟跟機送既姐。

入完隻碟之後，睇佢玩左一陣砌圖(係隻熊仔來，可以學英文，普通話喎???)
真係覺得仲衰過係屋企睇蔥蔥教波，我就話想走先啦。
佢就叫我幫佢搵隻有火箭既遊戲出來先喎
(因為隻碟個包裝度有隻有技火箭既game既圖片)
我就幫佢搵啦，好彩，
搵左差唔多一個鐘就搵到la，雖然佢一玩就話 : 唔好玩既。
對住佢地一家人，我真係冇野好講。
隔離屋就好D，從來唔講野既，我都唔知佢地屋企有幾多人 、姓咩。
剩係知有一隻狗囉。

佢好文靜既。去過我屋企就知。
見到你仲一定會打招呼tim。

Queen Of My Heart

真係......又想.......掟爆部電視機。

無線台慶年年無能聊。
自己頒獎比自己仲要冷晒好緊張咁。
真係估唔到汪呀姐拎女主角獎咩?好緊張咩?
D嘉賓又係無線自已人喎，D人做完嘉賓
一陣就走去擺獎，跟住仲要表演埋tim，好唔掂。
點解今年冇左蔥蔥做嘉賓既?上年有架?
拎到獎既都慘，要扮到好開心咁，
睇到周麗淇想喊又喊唔出個樣就知。
仲要成日見到Amigo個死廢柴，
忠仔個死PK竟然仲有得做主持!?真係咁唔夠人用咩?

仲有既係 ! 廖碧兒今晚著到咁竟然冇獎囉!?!?......點解?
好想打去無線問仲有冇天理?

講返今日，又去左上年果個econ講座。
突然發覺自己有好多壞習慣。
一早起身，一如以往，遲左半個鐘起身。
去到聽講座，一如以住，唔小心咁訓著左.......
訓醒，我同我個fd傾下計姐，呀sir己經坐起我隔離架la
點知我都忍唔到口咁講左多次吊同仆街
好彩呀sir唔理姐。

我諗我D壞習慣真係要搵日改下。

Mr Brightside

人到最後還是只能相信自己
但是這些人在初頭都就只能靠父母 !

















今日睇睇下"呀旺新傳"
發覺呀旺在全套劇裡都很想給我們觀眾知道一個訊息。
就係佢係傻既。
佢做每一個動作、講既每一句野
都好似同你講緊 : 我係傻仔來架。
一個真係傻既人又會唔會好似呀旺咁，咁想話比人知自己係傻既呢?
就好似一個男仔鐘意一個女仔咁
又會唔會周圍同人講自己鐘意個女仔呢?
又會否每時每刻咁提醒自己身邊既朋友知自己仲係鐘意個女仔呢?
我就覺得這些都好似一場戲咁
就好似比個話題等大家可以討論下咁。

一個袋要有牌子的襯托才是好
否則就會變得戴上也不舒服，設計也變得差劣
一個明明係好普通既人都會變到cheap晒
覺得若果唔想比人睇死就要開始發力買名牌。

我極之唔鐘意D種人，可惜遍遍D個世界有好多咁既人。
口中說唔熱愛牌子，但一講到牌子就好似食左興奮劑咁
係咁講唔停口，仲好似專家咁教埋你買邊個好。
大家千其唔好做D種人呀。











今日，好似話有個摔角手死左。
我好想介紹下佢生平，但我連係yahoo新聞都搵唔到佢既死訊
可能佢想死得低調些啦。我都係聽我D fd講至知佢既逝世。
但我都盡量把我所知道佢既野講出來，以表示尊敬佢既死。
佢應該係一個很出色的摔角手........嗯........等我諗下先........
佢既絕招係起張椅子上跳下來。(其實我都唔係好清楚，
我都係今日睇過我個fd示範一次)
佢打機能力值overall都有88架，但是我就冇用過佢。
不過佢下一集應該可以變成legend人物，我諗會多D人試下用佢既。

其實唔係個個人都可以變成傳奇人物架。

Against All Odds

路飛終於打到海軍監獄的最深處
看來大戰要一觸即發了 !
唔明點解有些PK未睇過就話唔好睇 !
覺得唔好睇既原因係因為路飛冇武器喎
其實我想講拳頭就係佢既武器
龍珠既孫悟空都冇武器啦，唔通你細過唔鐘意睇咩?
你唔可以因為自己近排鐘意睇緊個套漫畫個主角係用刀既
咁你就話主角唔用刀既漫畫就唔好睇架嗎。
更何況one piece另一個主角卓洛都係用刀既
他仲係用三把刀的。

正所謂羅蔔青菜，各有所愛 !
個個人鐘意睇既漫畫都唔同，
無理由因為一D白痴理由就話自己未睇過既漫畫唔好睇。
















昨晚，睇左英格蘭對阿根廷
我平時好少睇波，不過睇親都幾精彩
球賽最後５分鐘時，當我個fd講緊 : 英一定lose!
打足全場都唔多見既奧雲（我同我個fd直頭以為D場佢冇份打)
竟然就以頭鎚梅開二度，反勝返阿根廷，真係勁!

Silent Emotion

唔好嫌我煩，Ｚ高達電影今日上映
冇睇既考慮下去戲院睇，真係好睇架！
唔知香港幾時至有第三部睇呢？

今日，學校調位
今次調位方式很特別
我個位，係全班同學一齊幫我揀架
好開心呀^-^
全班29人，除我以外其他28位同學
諗過計過自己想坐咩位就調，
想坐我過位就埋去坐，亦完全唔洗通知我^-^
當28位同學都坐左自己最心儀既位子啦
剩返個一個位，未就係我個囉
所以我個位係全班同學一齊同我揀架。
多謝呀 !

Nobody's home

真係想掟撚爆部電視!

等左成晚又冇綱練睇!
無線都差唔多成個月冇做la!
我唯有同自己講：唔緊要啦，愛德華打左咁多集
什息返個哩兩個月都好應該，夜D仲有魔剎睇

出一出去，特登趕返來睇魔剎
無線竟然播緊籃球 ! 又唔播魔剎
我都唯有同自己講：唔緊要啦，比約翰殺少人一集啦
殺得人多都要什息下架。

唯有睇籃球，雖然唔鐘意睇，but有自己祖國喎，
結果，中國不敵日本!
我再唯有同自己講：唔緊要la，中國都慣左輸架la
至多唔打信長之野望，打多D三國誌，來抵制日本la。

唉，咩都唔緊要la，可以同自己講既都講晒la
連起初想掟爆部電視既心情都冇埋，
熄左部電視算。











There's a place off Metro Plaza
where we used to sit and talk with other
we were all sixteen and it felt so right
sitting all day,staying up all night.

More than Words

Biohazard4原來己經出左!
唔係 fd提下我，我都唔知!
我地究竟係未F7?，我自己都想問，
不過點都好!等埋我至好打爆呀張葴，好快我就教返你點打架la!
係，我只會記得幾時有game出，而好少記得幾時有測驗!
不過點都好!過埋陸運會至算!
唔...差D都已經唔記得自己以前既強項就係打Biohazard tim

講返今日，對唔住，
大家唔好嫌悶，我又要唱衰李賢堯(不過保正全部真人真事!)
我個fd早就申請左學費減免，但唔知點解收唔到學校既回條
所以放學我就同佢去問.......
我同我個fd首先去問Miss Kwok(我果個班主任呢)
佢真係一個好盡責既班主任，不枉我上次用左咁大篇幅既日記來講佢!
佢既回應係 : 唔知喎，你係唔係唔見左呀?DD野校務處負責個喎
你去搵校務處果個CoCo la(我當時心諗，CoCo個名咁似某早餐既一隻野既?)。
跟住我地就一心諗住去校務處搵CoCo D個人 la，
去到後先發覺，CoCo D個人原來係唔存在既!
校務處根本係冇人叫CoCo既!
(唔通Miss因為食得CoCo既早餐多，所以唔小心老點我地?)
好!我地算數，搵到負責學費減免既蔡小姐都一樣!
佢既回應同Miss Kwok一樣係扣人心懸既!
條八婆話 : 唔知喎，你打去學生資助辦事處問啦!
嘩，咁下次係學校唔見左野實係要打去警處報失啦!

校長為左節省電費，已經日日唔開冷氣架la
校長又為左節省老師既支出，將老師抄左，又叫返佢返來做代課
現在校務處為了節省人力資源，有咁既回應係合情合理既!

其實學校已經比左好多野我地架la
又有locker喎，雖然你之前果日要拎定之後果日上堂要用既書返屋企姐
不過都好過冇呀，你可以小息放D書入去，放學拎返出黎架。
其實學校真係比左好多野我地既，睇你識唔識用既姐!

Shut up

You think you know what everyone needs
You always take time to criticize me
It seems like everyday I make mistakes
I just can't get it right !
It's like I'm the one You love to hate
But not only today!

Miss!
你講句野都口疾疾咁就咪講咁多啦
講既野又係已經重複又重複既廢話，
昨天家長日，
由你一見到我來，就走去教員室針水飲
就覺得你特登晒我時間，
到講我英文成績既時候，我家姐話驚我英文唔合格。
從你同我家姐講：我仲驚過你呀!
佢地到時好大可能會有大半班人唔合格架。
我至知道原來你比我屋企人更關心我既英文成績
咁又係，我地英文考得唔好，你又好難同校長交代既
由你講：可能到時有奇蹟發生!你細佬英文合格呢
我至知道原來要有奇跡發生，我英文至會合格，
都好，我到時可以科科都坐起到咩都唔做咁等奇跡發生，
還掂我就算好努力都要靠奇跡發生至會合格架la
但係唔係喎， Miss，你英文教得咁好，
我驚奇跡發生埋，我英文都唔合格喎，咁點算好呀？等叮噹呀?
由昨天整個家長日聽你講既野，
short既都聽得出你已經睇死左我
雖然我從來冇當過你係老師姐
不過你名義上稱得為一個老師，點可以睇死學生架

大家!
今日開始所有測驗、考試、公開試
一齊同Miss Kwok等奇跡發生la!

Bohemian Rhapsody

張相係有D舊，
不過佢都幾靚，
睇完陳敏之，
又到我講野。


本來今日唔會又寫個日記，
不過今朝icq有D幾有趣既對話
可能你會諗：你icq講咩
關我鬼事呀?
不過有冇時間既人都一定要
睇下！







E段係我同棠棠既對話，當時係10點半。 P-我 C-棠棠

P: 其實你今日要返幾點
C: 8:30
P: 哦，8點半
C: 哈哈係呀 依家返又唔係唔返又唔知點因為中文我走左好多堂
P: 唔理啦 去睇中醫啦
C: 好 就唔返啦我就係等你呢句 哈哈
P: "做大事！願付出一生代價！"就唔好返啦！
C: 哈哈寶兒
P: 我地要男人心一字碼！唔返就唔返
C: 自己都敢叫好 叫敵對不敢說話！
P: 咁熟既首歌D詞來架?
C: 係呀 哈哈
P: 我地今日先發覺原來佢首歌D歌詞咁man架！
C: 等我之前一直誤會呢首係廢歌原來咁有意思的 哈哈
P: 唔怪得寶兒話自己係歌手啦!我仲以為佢short左至咁講原來係我以前無知
C: 哈哈哈哈 寶兒: "呢到除左克勤 第二就係我架啦"諗真D 其實他講野都有point架喎
P: 佢講D句個時我仲以為佢飲醉左tim"原來係眾人皆醉，我獨醒"
C: 哈哈 好似梅萬強!
哈哈 遲D可能真係係人屋企都會有過芊秋仔呢！ 哈哈

D段係我同我班上某一個同學既對話，當時係9點半
P :今日有咩做呀?
金:冇丫 晚要出去食飯
P :同古古佢地
金:no 佢地去海洋全園
P :係喎 你同屋企人呀
金:我阿婆生日丫
P :勁喎！又係呀婆生日，同一個籍口用兩次
金:你唔好屈鳩我
P :你成日話你呀婆生日，點知你邊次真呀！
金:之前成個月冇去
P :今次你仲唔係吹水!上次去完city你至去完
金:係呀！你吹咩！
金:我唔知佢今日生日 知我上次唔去！
P :你咁唔孝順架，難得婆婆生日緊係要去架la
金:你好孝順呀?
P :起碼我記得佢地幾時生日！
金:哇~果然夠孝順，我去都係費事比屋企人話至肯去！
P :.............

大家覺唔覺得D個同學勁唔孝順呢，佢婆婆都79歲啦！
我就好覺啦！
係喎！差D唔記得！
祝陸致康婆婆生日快樂！
康仔好乖呀，科科成績都好好，(唔係喎佢連section C個測驗都抄左喎！)
係econ同中史as(好彩你冇讀PA)唔夠D男同學勁。

Just A Ride

嗯........E張相係陳允沾迫我同佢影既。

中秋過後，天氣漸涼，在這帶點秋意的時候，
正是郊遊的好日子！

咁好既日子，所以今日有班會旅行，
但是！
我覺得今日都幾無聊下.........
其實唔關諗遊戲既人事，只係玩遊戲時有D亂，
尤其是玩水槍既時侯，根本就係白痴。
亂射未亂射囉，分咩組呀，有D人就走到九條街咁遠
有D人就比人射到死，個遊戲根本就有問題，
好彩最後冇人有事姐，玩返數字球仲好過啦。
加上旅行前，在樓下球場企左個幾鐘至出發
再加上塔車時間又長，整到我去到時，冇左開頭想玩既心情
到達後，食D野，行行企企，玩左一陣遊戲
就咁就完左la。

慶幸既係，D野食都幾好味。
同埋..........D比堅尼都唔錯。
係未?

Remember The Name

上次話一話Hunter，
D畫功即刻好返晒
小剛仲做埋封面主角，
真係勁！

講返今日，
真係越來越鐘意李賢堯 ，
唔只老師好，
連小食部D職員態度都
好過人既！









李賢堯小食部D食物又唔係好食過人
加埋佢D員工既工作態度真係一流，
日日D職員本身都好似死左媽咁既款，
D職員似來報仇，多過似係來做野既，
平時冇錢找可以找粒糖比你既，
比20蚊佢買包細野飲，可以找返6個半比你既，
加上員工態度極差，真係買完野食都唔開心

有一次早上好肚餓想買個三文治食，
其中一個職員就好串咁同我講：
唔可以買喎，你自己望下個鐘！(剛剛打左預備鐘數秒)，
唔比買唔緊要，但係D態度咁差，就真係好想打?
今日，放學同D fd一齊去買本簿
我果fd買本簿比20蚊，同一個八婆竟然話冇得找喎，
你買支野飲啦！我個fd竟然真係買，
買完佢找錢，就同我個fd講：下次買本簿就帶定散紙la！
小，比20蚊都要散紙，洗唔洗計好晒買足20蚊野，
唔洗你找呀！
所以我而家買野都盡量去汽水機la，
我覺得對住部汽水機會好過對住D員工 ，鐘唔鐘意都可以勁踢�
其實李賢堯(個人)都過左身la，
仲要成日比人小，真係慘，都係李中害到佢咁！
我諗除左一D聖誕願望係做一個出色既李中大使既人之外，
讀完都唔會同人講自己讀過李賢堯。
係未?

I'm Just A Kid

"你會看見時代的眼淚"
大家都知道D句野係出自動畫Z高達
D套係我覺得最好睇既高達動畫，除左因為高達故事本身吸引外
亦都因為Z高達故事感人！

近排就睇左兩套動畫劇場版，兩套都好好睇
所以想叫大家都睇下，希望大家都真係會睇la！

"刻上Z的印記，星之繼承者"

D套劇場版係將Z高達
整套動畫
濃縮成三部劇場版
D部只係第一部
雖然只係濃縮
但係動畫裡所有重要既劇情
佢都有係D套劇埸版出現
重有一些新既劇情，
無論大家有冇睇過高達既
都一定要睇下D套
因為好睇！





"看透唯一真相的背後
外表看似小孩，
卻擁有過人智慧
他的各字就是名偵探柯南！"

可能大家都知道
柯南D劇場版今集好睇，
下一集就會悶到訓著
由於上一套劇場版超廢，
廢到已經唔記得佢講咩la
所以今次又變返好好睇la
未睇過既，一定要睇下
如果唔係又要等再下集
先好睇

今次小五郎(右上角過過叔叔呢)
仲會大顯身手tim!

















D套唔係劇場版來既
one piece D劇場版 冇一套係好睇既
不過漫畫就好好睇，仲越來越好睇
唔似狐忍、hunter咁，越來越廢
其中既hunter，我睇果時仲以為自己睇緊草稿
個作者都只係求其撩幾筆就交課
one piece好睇好多，睇到路飛(戴草帽個個呢 )咁型就知！

Do It For The Kids

仲有半年倒就考A level
突然之間發覺自己上堂好充實，學到好多野

PA堂 - miss上堂只會走來走去，周圍問人識唔識做
仲一定會走去女同學度詳細解釋一至兩堂(要視乎果日係唔係連堂)

絕少教野，但落堂一定會派功課，叫人返屋企做

第二日上堂miss就會再開始走來走去，周圍問人..........

形成一個循環，但係唔交功課，又要放學留低做返喎

咁我學到D咩呀? 放學要即刻走，如果唔係就可能比人捉住留低

Econ堂-已經一個星期無帶notes上堂(一般人會諗：你econ堂緊係唔洗

用notes架la...)其實係因為上堂題外話既時間係多過本身上堂既
上堂時主要會討論：今年究竟邊個會拎諾貝爾經濟獎呢?
一個前屆既舊生佢重讀時係會考經濟科究竟拎唔拎到A呢?一話B呢?
定還是佢係講大話呢?定還是佢係好有實力拎A不過因為種種唔同既
因素以致佢拎唔到A呢?定還是..........DD又究竟應唔應該上堂討論呢?
咁我學到D咩呀? 上堂一定要專心，如果唔係眨下眼就落堂
中史堂-唯一一科一定要帶書上堂既，因為唔帶幾次就會記缺點架la！
不過本書唔洗打開既，放係台面，證明有帶就得架la
可能你會問：上堂唔打開書，本書又放係locker，咁測驗點算呀?
測驗只要答D格式落去就有17,8分架la(比公開考試拎A還要高出幾分)
所以我地全班最廢果果出到去都最少有B架la，其中某一個同學
在公開考試中只要答兩題(總共有四題)，佢已經拎到A架la，因為
佢次次測驗答一條都有24,5分倒(25分為滿分)，所以冇讀過中史、
甚至你唔知邊個係李世民(咩人來架，無記D二打六呀?)唔緊要，
只要你識D格式就可以出到去都拎A架la
咁我學到D咩呀? 內容係次要，格式最緊要
英文堂-自從上年個班主任走左之後，就日日都多左一堂英文上
因為個miss做左班主任，而家連班主任堂都變埋英文堂
不過英文堂個老師真係好重要架，堂堂都做past paper
唔係作文，就listening，果miss都係齋坐既姐，不過有時佢都教得
幾好，就係當教育署派一D人員來監堂既時候la，佢會好熱心咁
問同學答案，同學都會好踴躍咁舉手答問題(因為早在早上佢已經
叫某某同學陣間上堂—定要舉手答佢問題)
咁我學到D咩呀? nothing D個英文字
中化堂-較為有意義既一堂，教既都係一些關於人生的意義
不過果miss講野就好似唱緊嗺眠曲咁，搞到我上佢堂都一定好好訓
咁我學到D咩呀? 夜晚可以訓少一個鐘，因為上佢堂都可以訓過夠
ERE堂-最有意義的一堂，每堂都一定有要教的內容，有開始，有conclude
有電視睇，不過一個cycle得一堂，十日先有一堂
咁我學到D咩呀? 物以罕為貴，越多次數既堂學得越少野，反而
ERE DD廢堂(話佢廢定唔廢好呢，雖然話佢有D野學，但係某程度上
佢係廢個喎，A level又唔洗考佢)學到仲多野

睇完我果D咁充實既課堂，係唔係覺得連小學生都不如呢?
希望我既課堂唔會一直係咁啦，不過有D咁好既老師，
真係唔靠我自己睇下書都唔得la......

Sunday Morning

一年容易又中秋，呢句廢話大家都聽過好多次la。
不過諗諗下呢句野又廢唔晒，真係話咁快又到中秋節la。

見到YoYo拎住個燈籠就忍唔住好想燒左佢，
中秋節緊係要煲下臘、搵D燈籠燒架la，
唔通真係一家大細好開心咁一齊賞月，食月餅咩。
人地話每逢佳節培思親，我就覺得每逢佳節都會
同fd玩，唔記得左自己有屋企人。
不過今晚天文台話會落雨，落兩都好難玩火架la
今晚唯有等佢冇落雨果時玩勁D la~

星期日朝早真係好很無聊，唯有寫下個日記來晒下時間
不過我晒緊時間之餘，好快下次又一年容易又國慶
真係要玩多D之餘都要做下功課~

Happy together

難得屋企人比左部影到相既電話我，
我緊係影下我屋企來同大家分享la
其實E度， 只係我十分之一左右既玩具，
普通人緊係會以為我吹水，
但係識我既人就知道我唔
係講笑架la！


講番今日，我生日，
不過都要 返學，
都要交功課，
唔同既係
lunch幾個同學一齊
請我食飯
真係要講返聲多謝
(一人出左3蚊!咁多喎)
跟住夜晚又有fd
請我飲野喎
真係多謝各位la~
哈哈~其實錢唔係問題
至緊要大家有心請~






又講返生日，18歲la，
遲D又要去拎身份證，真係煩
D排仲累積左幾何級既功課tim架
真係唔想去整，可唔可以
搵人代我去整架？唔想去喎


今晚家姐買左個蛋糕比我
雖然好細個，
不過真係多謝佢la
雖然好少生果，
不過都真係多謝佢la
雖然我由細到大都唔鐘意食黑森林蛋糕，
不過都真係真係多謝佢la


到佢生日
真係想送返部高達比佢做生日禮物。

不過今日都幾開心

Separate ways

"一不做，二不休"
意思即係一係咩都唔做，一係就唔什息都要把事情做到最好！
我十分喜歡這句說話！
如果比大家揀，唔知大家會揀"一不做"定"二不休" 呢？
我就會揀前面的"一不做" ，起碼冇咁辛苦
佢都令到我暑假可以舒適咁渡過。
但係明天又要開始天天返間雞校la，
希望新一年既校園生活都可以愉快、舒適咁渡過啦！

Beautiful soul

我就是相信E種咁清純既女仔，
係最吸引到男仔既，
第佢拎冠軍既!
一個網頁都需要女仔相至有人來睇啦(咩話?
有人話佢要溫書~係喎唔記得左佢剩係係屋
企對住個窗用望遠鏡來溫書既tim~)
咁一個游池當然都要成日有女仔係度至有人去啦~
今日就同D同學去左游水,，
不過好黑仔，唔至運氣上既黑，
一出地鐵站行左一陣，就有人話城門谷游池
今日要「洗池」， 所以冇開，
跟住我被迫要服從佢地去美乎個游池，
最後搞到我而家曬到成身都黑晒....
如果唔係去游水可以睇到女仔，
我今日真係即刻返屋企!

好似今日咁，就有個著籃色游衣，樣子十分清純既女仔，
帶埋個細妹一齊去游水，游游下，我個fd仲唔小心咁，
拎左果個小妹妹既氣球，跟住小妹妹就同我個fd講：
「可唔可以比返個波我呀?」
我果一刻真係即時笑到死，我個fd緊係比返個氣~球~人啦
話晒人地都係小妹妹，不過佢家姐真係幾靚(連吳俊輝都話佢靚喎~)
唔知下次去游水仲會唔會見到D咁清純既女仔呢?

不過我去游水都主要係為左強身健體，睇女仔DD野，我都條陪fd既姐~

Walking Away

一朝早起身屋企就冇水
因為樓下爆左D水管搞到咁
刷牙洗臉都要用家中剩下既食水
我覺得真係好鬼煩,尋晚已經鬼咁大雨,嘈住晒
加上未起身,就比隔離屋隻狗嘈醒,起身又冇水
剩係冇停電,用到部電腦
如果日日都係咁,我真係唔想做人

另外,我的好友都入到晒ive la,不過佢地仲有D要去博第二輪選
佢地都係有實力,只不過係冇資格讀文憑姐,真係可惜
英文唔合格真係好麻煩,唔只冇中六讀,ive文憑都唔收佢地...

突然諗起一個就來要去殮房隔離返學既好友(今次係你呀棠少)
send比我既一首歌walking away既歌詞

I'm walking away, from the troubles in my life
I'm walking away, oh to find a better day
I'm walking away, from the troubles in my life
I'm walking away, oh to find a better day
I'm walking away..........

Untitled

近年，隨著電腦及互聯網的普及，
網上日記成為一種嶄新的寫日記方式。

起大家都有網上日記既潮流下
我都迫住要一齊迎合E個潮流
起好得閒,好無聊,同勁無野做既時候我就會寫E個日記 ,可能係每日

不過大家記住無好成日上來睇(話緊你呀雷龍!)
因為我寫既都係一D關於我既秘密
越少人知越好
知道咁多對大家都無咩好處
所以大家一日最多上來睇幾次好la
同埋記住唔好沉迷呀~